Sie sind hier: Startsäit » De Lėtzebuerger Jakobswee

De Lėtzebuerger Jakobswee

Ëffentleche Transport - Rotschléi - Beschëlderung - Iwwernuechten - Etappen - Pilgerpass/Stempel

Zënter dem 1. Mäerz 2020 ass zu Lëtzebuerg den ëffentlechen Transport (Zuch - Bus - Funiculaire - Tram) gratis. Um Internetsite mobilitéit.lu kann een all Verbindunge fannen.

All Pilger dee sech op de Wee mécht wëll wëssen, wou hie kann iwwernuechten. Duerfir gi mer eng Kéier de Lëtzebuerger Wee duerch, vu Léiler erof op Schengen (ronn 180 Km), a probéieren Iech déi Méiglechkeeten unzeginn, déi een huet, fir ënnerdag ze kommen. Reservéiert wa méiglech d’Hotellen oder d’Herbergen am Viraus.
Deene Leit, déi de Wee wëlle mat Kanner goen, an ee Buggy derbäi hunn, rode mer zu Veinen unzefänken. Eiser Meenung no ass d’Streck vu Léiler op Veinen duerfir net gëeegent.

Beschëlderung vum Wee

Déi blo-giel Jakobsmuschel mat richtungsweisendem Feil (wann ouni Feil ëmmer a Richtung ausstralend Muschel goen) begleet Iech op deem ganze Wee. Wa keng Muschel oder keen Autocollant konnt fixéiert ginn, da muss Der deem giele Feil (Wee, Fiels, Steen, Mauer, Bam asw.) nogoen. Déi genau Streck fannt Der ënnert : geoportal.lu- (Tourisme > Chemins de randonnée > Chemin St Jacques de Compostelle.)

Wéi kommen ech op Léiler ?

Am beschten Der fuert mam Zuch op Klierf. Op der CFL-Gare zu Klierf, méi genau op der Bus-Gare vum Lycée (Dir kommt aus de Gare a gitt ongeféier 250 Meter Richtung Lycée) do steet de Bus. Dee fiert op Léiler (Dauer : ronn 30 Minutten) an Der klammt op der Haltestell ‘Schull’ eraus. Vun do aus ass de Wee gezeechent. Der musst ronn 2 Km erof an den Dall goen Richtung ‘Trois Frontières’ (Oueren). Beim Dräilännereck (Europamonument) fänkt deen eigentleche Lëtzebuerger Jakobswee un.

Vu Léiler op Veinen, Bréck, Statu Nepomuk (40,8 Km - an enger oder an zwou Kéieren)
Dee Wee ass bei Héichwaasser um Deel Europamonument - Doosber/Dasburg net iwwerall ze begoen. No Doosber/Dasburg sinn och Passagen déi laanscht d’Strooss ginn wou net ëmmer een Trottoir ass.
Wann Der eng gutt Konditioun hutt, da packt Der et bis op Veinen. Do fannt Der een Hotel.
Wann dat Iech awer ze wäit sinn, kënnt Der d’Etapp an zwee deelen. Hei dräi Méiglechkeeten, fir de Wee ongeféier an der Mëtt kënnen ofzebriechen:

- Der reservéiert en Hotel zu Veinen fir 2 Nuechten. Ënnerwee si Bushaltestellen. Déi éischt Haltestell ass zu Doosber/Dasburg, no ronn 16 Km ab Léiler. Déi nächst Haltestell ass zu Ruederssen/Rodershausen, 1,7 Km méi wäit. De Bus féiert Iech op Veinen. Deen aneren Dag kommt der einfach nees mam Bus op déi Plaz zréck wou der opgehalen hutt, a gitt de Wee vun do aus weider.
- Der réservéiert zu Doosber (17 Km) op der däitscher Säit, do ass en Hotel (Hotel Daytona), oder zu Eesbech/Eisenbach (22 Km) Kounenhaff (Camping, Restauratioun, Lokatioun vu Chaleten).
- Der reservéiert en Hotel zu Klierf. De Bus féiert Iech dohin ouni datt Der musst ëmklammen.

Vu Veinen op Iechternach, Basilika (27,7 Km)
dierft a Punkto ‘Iwwernuechten’ kee Problem sinn. Zu Iechternach sinn Hotellen an och eng Jugendherberg mat 118 Better direkt um Iechternacher Séi, net wäit ewech vum Jakobswee.

Vun Iechternach op Gréiwemaacher, Kierch (21,5 Km)
rode mer Iech, wann Der zu Gréiwemaacher ukommt nees mam Bus zréck op Iechternach ze fueren. Der schlooft dann 2 Nuechten an deem selwechten Hotel. De Bus bréngt Iech deen aneren Dag nees hannescht op Gréiwemaacher. Zu Gréiwemaacher selwer ass keen Hotel et sief Der gitt viru bis op de Potaaschbierg (Hotel Simon’s Plaza), ronn 5 Km méi wäit. Dat ass awer keen Ëmwee wëll den Hotel läit praktesch um Wee. Der kënnt awer och zu Gréiwemacher iwwer d’Bréck op déi däitsch Säit goen. Zu Wellen (no der Bréck , riets), op ronn 1 Km, ass en Hotel (Pensioun Weber).

Vu Gréiwemaacher an d’Stad Lëtzebuerg, Kathedral (34 Km)
ginn et vill Méiglechkeeten fir ënnerdag ze kommen. An der Stad ass eng grouss Jugendherberg mat 240 Better an un Hotellen gëtt eng grouss Auswiel.

Vu Lëtzebuerg op Diddeleng, Kierch (25 Km)
kann Der entweder zréck an d’Stad fueren (dat geet ganz gutt mam Zuch) oder awer zu Diddeleng am Hotel (Hotel Cottage) iwwernuechten. Vun Diddeleng aus kommt Der och ouni Weideres mam Bus op Esch-sur-Alzette. Bei der CFLGare, do wou dem Bus seng Endstatioun ass an all d’Busser fortfueren ass eng nei Jugendherberg mat 122 Better. Deen aneren Dag fuert Der mam Bus op Diddeleng zréck.

Vun Diddeleng op Schengen, Bréck (31 Km)
ass a Punkto Hotel och kee Problem. Ier Der op Schengen kommt, gitt Der duerch Rëmerschen. Do ass eng Jugendherberg mat 150 Better. Mee och hei kann ee mam Bus zB op Réimech fueren an do een Hotel sichen.

Wou kréien ech eng Credencial ?
Déi kënnt Der bei eis “Frënn vum Camino de Santiago de Compostela asbl” (Tel 50 00 85 - meca@pt.lu) kréien fir 5 € :
BILL LU23 0026 1860 9432 7800
CCPL LU29 1111 2311 2571 0000.
Der bezuelt a kritt se heem geschéckt awer net vergiessen Är genau Adress unzeginn. Et sinn déi offiziell unerkannte Credencialen. Mär bestellen se zu Santiago am Pilgerbüro. Dozou eng Bemierkung : d’Credencialen kréie vun Zäit zu Zaït een neie ‘Look’, duerfir bleiwen déi Al awer nach ëmmer gëlteg.

Wou kréien ech ee Stempel ?
Am Beschten där loosst iech do wou Der schlooft (Hotel) ee Stempel mam Datum an äert Bichelche maachen. Der kritt en och am Touristebüro, op der Gemeng oder beim Paschtouer. Wann dat net geet, da gitt an ee Café, an eng Tankstell asw. Et gëtt keng extra Virschrëften wëll dat muss kee Stempel aus enger Kierch oder mat enger Jakobsmuschel sinn.

nei Schëlter - Feil nei Schëlter - Feil nei Schëlter - Feil al Schëlter

¡Utreļa y Suseļa! ¡Buen camino!

____________________________________________________

Allgemenges

Ee vun den Ziler vun de "Frënn vum Camino de Santiago de Compostela" ass de Camino de Santiago iwwer Lëtzebuerg ze beschreiwen an ze verweisen. Dëse Wee ass mam Netzwierk verbonnen, dat d'Nopeschassociatiounen ageriicht hunn.
Am Mëttelalter si Pilger op déi existent Verkéiersrouten, déi réimesch Stroossen a laanscht Waasserleef gepilgert.
Bei der Auswiél vum Pilgerwee hunn d '"Frënn vum Camino" e Kompromëss gemaach tëscht der Vergaangenheet an der heiteger Zäit. De Wee ass souwuel praktesch wéi och authentesch. De Wee féiert do laanscht wou de Jacobus Kult zu Lëtzebuerg kultivéiert gouf. Beispiller si Münschecker, Roodt / Syr, de Jakobsbierg bei Berburg, .. Och bekannt Pilgerplaze wéi d'Graf vum Hellege Willibrord zu Iechternach oder d'Wallfahrtsplazen déi eréischt an der moderner Zäit entstanen sinn wéi z.B. d'Kathedral vu Lëtzebuerg.
Well de Wee vun de moderne Pilger benotzt gëtt, berücksichtegt en och déi häiteg Verpflegungs - an Iwwernuechtungsoptiounen.
Den Ënnerhalt vum Wee ass doduerch geséchert, dass en am Kader vun de genannte Konditiounen, existent Wanderweeër benotzt, déi vu lokalen Tourismusorganisatiounen ënnerhale ginn

____________________________________________________

Besucher seit August 2011

Besucher heute: 3 / Sie sind der 639. Besucher